John Karsten Livden – lege og kyrkjebygger i Arna

Foto: John Karsten Livden hadde planlagt å reise til Kina som misjonær. Men Gud plasserte oss i Arna, seier han. (Foto: Audun Stølås)

John Karsten Livden blei fødd 14. juni 1944 og vaks opp på Laksevåg.

• I dag kjenner eg meg heilt og fullt som Arna-buar. Eg ser det som gudfeldig at vi kom til Arna. Frå først av hadde eg tenkt å reise ut som misjonær i Kina. Eg var sterkt inspirert av mellom anna Annie Skau Berntsen – Søster Annie – som i mange år var  misjonær i Hongkong og Kina. Men eg kjenner no at Gud har plassert oss i Arna og er takksam for det, seier Livden til arnafolk.no

Han studerte medisin i Wien i Austerrike. Etter det måtte han ha tilleggseksamen i Noreg. Så var han i turnusteneste på Voss i eit år og på Stanghelle i eit halvt år.

Livden arbeidde som undervisningsleiar på sjukestova på marinebasen på Haakonsvern. Familien budde då hjå familien Almelid på Tungeland i Langedalen. Dei blei misjonærar i Afrika.

På den tiden var legedekninga i Arna kritisk dårleg. Legen som  var her, var meir enn fullbooka og kunne ikkje ta inn fleire pasientar. Livden opplevde då at fortvilte menneske stod i kø utanfor døra til han i heimen for å få legehjelp. Det var på denne tida mange flytta til Arna. Han starta då med ettermiddagspraksis i Arna ein dag i veka. Han utvida dette etter kvart og fekk fleire legar med seg. Han heldt på med dette til kommunen fekk orden på legedekninga i Arna. Livden blei då spesialist på hudsjukdomar og hadde praksis i Sentralbadet i Bergen.

Foto: Eit barne- og ungdomsarbeid som starta i blokkene i Stølsvegen, blei opptakten til at Arna Misjonsmenighet blei skipa i 1984. (Foto: Audun Stølås)

Han og kona Britt starta ei bibelgruppe i Arna. Etter kvart overtok dei det barne- og ungdomsarbeidet som Steinar Haugen hadde starta i blokkene i Stølsvegen. Dette arbeidet blei flytta til Ådnamarka skule og vaks og vaks jamt og trutt. Det blei starten på Arna Misjonsmenighet, som blei skipa i 1984 og tilknytta Misjonskyrkja i Noreg – eit av dei eldste frikyrkjesamfunn i landet.

Denne kyrkjelyden driv no sitt arbeid i nye og fine lokale i Hølbekken 1 på Arnatveit. Livden er framleis aktiv som forkynner. I sitt 80. år framførar han den kristne bodskapen med stor kraft og visdom.